شنو هو دور المدرسة ؟
 |
| المدرسة |
عالم الاجتماع الفرنسي
الشهير بيير بورديو كيقول بلي الوظيفة د المدرسة هي إعادة إنتاج نفس الطبقات اللي
كاينة فالمجتمع،بمعنى أوضح إبن الطبقة الميسورة غادي يتخرج ميسور و إبن الطبقة
الكادحة غادي يتخرج كادح...
و المدرسة كاتعتمد فهاد الوظيفة على تكريس الهيمنة
الثقافية د الطبقة الميسورة فالمدرسة و كاتعتابرها الثقافة الشرعية الوحيدة و
كتقمع باقي الثقافات، و فاش كيلقى تلميذ الطبقة الميسورة امتداد لثقافة البيت
فالمدرسة كايسهال عليه التفوق على عكس تلميذ الطبقة الكادحة اللي غادي يلقى ثقافتو تقمعات و غادي يصعاب عليه يتفوق...
لفهم النظرية أكتر
غانتخيلو جوج أشخاص واحد كيتريني التايكواندو و الآخر المصارعة،نظمنا لهم منافسة
فحمل الأثقال...هنا باين شكون اللي غادي يربح و باين بلي المنافسة غير عادلة و
متحيزة لطرف على حساب الآخر...
هاد المنافسة تقريبا
الغير العادلة هي اللي كاينة فالنظام التربوي و ها كيفاش على طريقة شوف تيفي😂...
التلاميذ فالعادة
كينتميو لطبقات اجتماعية مختلفة ناخذو منها الميسورة و الكادحة.
تلميذ الطبقة الميسورة
كيورث على العائلة إرث ثقافي مهم كيتمثل ف ثقافة عامة كبيرة حيت ولف يطالع كتوبة و
يناقش فالدار، لغة أم و لغات أجنبية راقية حيت بيها كيهضرو فالدار،مهارات فالوقوف
و لباقة فالتحدث الخ حيت كيمشي للمسرح و معاهد الموسيقى الخ...
على العكس من هادشي تلميذ الطبقة الكادحة معندو لا لغة
مزيانة و اللغات الأجنبية والو،لا مهارات فالوقوف و لا فالتحدث و الثقافة العامة
طايحة بزااف...
هنا فاش النظام التربوي كيعتامد فتدريس الشعب اللي
كاتأكدي لوظائف مزيانة على لغة أجنبية فراه كتقصي عدد كبير من أبناء الطبقة
الكادحة و كتعطي فرص أكبر للتلاميذ الميسورين اللي كيوقع لهم بحال الحوتة اللي
كتخرج من الحوض و كتحط فالبحر،مكيحسو بحتى تغيير بين الدار و المدرسة...و فرضا الى
توفقو تلاميذ الطبقة الكادحة فاللغة فراه ممكن يتقصاو فالشفوي بسباب المعايير
المعتمدة فالتقويم اللي حتى هي كتفضل ثقافة الميسورين فاش كتعتامد على طريقة
الوقوف و التحدث اللي غادي يكونو جداد على التلاميذ الفقراء...
تلميذ الطبقة الكادحة ولو يكون مكون علميا فاش غادي
يتقصى بسباب اللغة غالبا غادي يتوجه للتكوين و يتعلم حرفة و غادي يكون بحال الأب
ديالو عامل...و هنا غاتكون المدرسة أدات الدور ديالها على أكمل وجه و حافظات لنا
على نفس الطبقات القائمة فالمجتمع...
واخا هادشي كيبان من النظرة الأولى ماغاديش يأثر بزااف
و لكن راه بناه على إحصائيات كتبث أن الأغلبية الساحقة من أبناء الطبقة الميسورة
اللي هوما قلال أصلا يعني بحال الى قلتي 9 من 10 كيوصلو لوظائف راقية،في حين أن 1
من 100 من الطبقات الكادحة هو اللي كيوصل.
ذات صلة بالدارجة:
إرسال تعليق
0 تعليقات