المسيحية النشأة الزمان والمكان

المسيحية

توضيح:

غنهضرو على المسيحية كما كيعتقدو المسيحين مشي كما كنشوفوها حنا المسلمين والمراجع المستخدمة كلها كتب مسحية

المسيحية او النصرانية هي ديانة ابراهيمية توحيدية

كيتقدرو أتباعها بأكثر من 2,4 مليار إنسان، وهي الديانة الاكثر انتشار فالعالم حاليا وكيجي بعدها الاسلام

كلمة المسيحية مشتقة من إسم المسيح عيسى عليه الصلاة والسلام، أما كلمة النصرانية ف فيها اختلاف، كاين لي كيگول تسماو بالنصارى بسبب مدينة الناصرة موطن المسيح عيسى وهي مدينة موجودة ف فلطسين الى اليوم والتفسير الثاني لانهم نصرو النبي عيسى واتبعوه فالوقت لي كذبوه اليهود وكاينا اشارة فالقرآن لهد القضية { قال عيسى ابن مريم للحواريين من انصاري الى الله قال الحواريون نحن أنصار الله}

كتقوم المسيحية على معتقد الثالوث الشهير «الآب، الابن، الروح القدس »(مغنشرحوش حيت عيت منحماق ومفهمتوش واصلا النصارى براسهم مفهمينوش ههه) والصلاة عندهم عبارة عند شكر ودعاء وغالبا كيصليو قبل اي مناسبة وكاين لي كيصلي قبل والاكل وبعده..

الكتاب الرسمي للمسيحية كيتسمى الكتاب المقدس وفيه 2 أجزاء

*1 العهد القديم : وكيتكون من 39 كتاب مشتركة بين اليهودية والنصرانية أي عهد النصرانية اليهودية فاش كانت النصرانية مزال مستقلاتش براسها كديانة مستقلة عن اليهودية وحتى اتباعها كانو يسمو يهود..

*2 لعهد الجديد : كيحتوي على 27 كتاب ومنهم الاناجيل الاربعة (متى_ مرقس_لوقا_يوحنا) وفهد العهد غتنطلق المسيحية انطلاقة حقيقة وتبدا تنتشر فالعالم مور صلب المسيح عيسى سنة 33 ميلادية بمعنى فاش كان فعمرو 33 دوز منها 3 اسنوات الاخيرة فالدعوة الى الله وبعد ما قدم تعاليمه ومواعيضه وأجرى المعجزات والتنبؤات سلم المهمة لثلاميذه (12 من الحواريين ثلامذة المسيح عيسى + ثلامذة الحواريين) وصعد الى الله مع الوعد بالرجوع مرة اخرى..

اهم ثلامذة الميسح عيسى هو القديس بطرس لي أغلبية المسيح كيعتبروه ثاني أهم شخصية فتاريخ النصرانية وهو مؤسس الكنيسة الكاثوليكية فروما وهي أكبر كنيسة فالعالم كاينة فدولة الفاتكان فقلب روما الايطالية وكتحمل الاسم ديالو (كاتدرائية القديس بطرس) ولولا هو كانت انتهت المسيحية بعد صلب المسيح عيسى لان اليهود رفضو الاعتراف بالنبي عيسى انه هو المسيح المنتظر والمخلص لي غيعاودو معاه هيكل سليمان ويرجعو امجاد بني اسرائيل كما كان الحال فعهد نبي الله داوود، وليومنا هذا اليهود مزالين كينتظرو ظهور المسيح..

وسبب نهاية العز داليهودية هو حاكم الامبراطورية البابلية لي اقتحم فلسطين ومدينة أورشليم (القدس) وهدم هيكل سليمان وخوا اليهود من فلسطين وداهم سبايا وعبيد عندو (الهيكل عبارة عن معبد كبير كيگولو اليهود انه كان مبني فبلاصة المسجد الأقصى داكشي لاش باغيين يريبوه باش يبنيو المعبد ديالهم بلاصتو مع المسيح المنتظر)

وبعد سقود الامبراطورية البابلية على يد الفرس غيعاود حاكم الفرس (قورش الاكبر) يسمح لليهود بالعودة لأرض فلسطين وبعض المؤرخين كيگولو ان بلفور تآنسبيرا من قورش الاكبر ومنو خدا فكرة وعد بلفور بعودة اليهود لفلسطين بعد سقوط الامبراطورية العثمانية نهاية الحرب العالمية الثانية

المسيحين كيعتاقدو أن النبي عيسى هو إبن الله لي سيفطو للبشرية باش يطهرها من الخطايا ويتحمل فبلاصت اتباعو گاع الخطايا ديالهم لذلك مشا عند يوحنا المعمدان (هو النبي يحيى ابن زكريا فالاسلام) دار ليه التعميد فنهر الاردن (التعميد هو طريقة كيديروها اليهود بالماء لتطهير الجسد بعد التوبة) فالنبي عيسى دار التعميد اعترافا منه بخطيئة الامة كلها وانه غيطهر الجميع من الخطايا...

سبب صلب المسيح عيسى :

كان احتفال عيد الفصح (ذكرى تحرر اليهود من فرعون بقيادة النبي موسى) فداك النهار المسيح عيسى ددخل للقدس ومشا للمعبد وبقا كيغوت على رجال الدين ديال البلاط دوك لي دايرين الدين وسيلة للاسترزاق وكيلحسو الكابة للحاكم..المهم حيح عليهم بالمزيان وأصلا الرومان لي حاكمين فلسطين كانو خايفين من المسيح لايدير عليهم شي ثورة خصوصا بعد معجزة إحياء الموتى ولاو عندو أتباع فلقاو هد الحادثة سبة وشدوه ولسقو له تهمة الاخلاء بالنظام وخلق الفتنة وكاحكموه وصلبوه ولي تولى المحاكمة هو حاكم منطقة يهودا لي كانت فلسطين داخلا فها وكلشي داخل تحت حكم الامبراطورية الرومانية

كما المسلمين كينقاسمو لسنة وشيعة و...فكذلك النصارى عندهم بزاف دالطوائف اشهرها ثلاثة فرق

1 الكاثوليكية : وهي اكبر الفرق المسيحية كيتبعو بابا الڤاتكان فالكنيسة الكاثوليكية فروما (هو لي جا عند الملك) وكيتقدرو اتباعها بملياو و 400 مليون كاثوليكي

2 البروتستانتية : كتجي فالمرتبة الثانية بعد الكاثوليك من ناحية عدد الاتباع وكيتقدرو بحولي 800 مليون بروتستانتي حول العالم مؤسس هد الفرقة هو مارثن لوثر فالقرن 16 بعدما تخاصم وانعزل على الكنيسة الكاثوليكية

وفالاخير الارثودكسية أتباعها فالشرق بحال مصر سوريا ، تركيا...

المراجع

كتاب الاديان حول العالم
كتاب يسوع المسيح
كتاب تاريخ الكنيسة
كتاب الله يسير مع شعبه

ذات صلة بالدارجة:

المسيحية النشأة الزمان والمكان - بالدارجة -