الصين الاله الرقمي يراقبك
 |
| الصين الاله الرقمي |
سنة 1949 الروائي الشهير جورج اوريل غيقوم بنشر رواية
بعنوان (1984) ولي تعرفات أكثر فالوسط الفني بإسم (الاخ الاكبر يراقبك...
حاول الكاتب يجسد فروايتو مدى المعاناة لي كيعيش الشعب
الانجبيزي في عهد الاشتراكية الانجليزية او نظام الحزب الواحد لي نصب نفسو بمتابة
الاخ الاكبر للمواطنين وعندو عليهم السلطة ومن حقو يراقبهم فاي وقت وفأي مكان..
لدرجة انه فينما دورتي وجهك كتقرا لافتة كبيرة مكتوب فيها الاخ الاكبر يراقبك..
65 سنة بعد رواية اوريل
غتخرج لينا الصين بنظام معلوماتي هو الاول من نوعه على مر التاريخ ،كتقرر فه ان
جميع المواطنين غيوليو خاضعين للمراقبة الالكترونية من طرف الدولة وبواسطة هد
المراقبة كل مواطنة ومواطن صيني غيحصل علي تنقيط او درجة ، ومن خلال معدل النقط لي
حصلتي عليه غنعرفوك واش نتا مواطن صالح او العكس...
مباشرة بعد نجاح الثورة الصينية سنة 1961 غيعلن قائد
الثورة (ماوتسي) تبنيه لفكر الفيلسوف الالماني كارل ماركس (الماركسية ، الدين
افيون الشعوب) وبلي الى بغا يقود الصين للنهضة الصناعية خاصو يقضي علي الدين..
داكشي لي كان وتم هدم الاف الكنائس والمساجد ومنع
ممارسة الطقوس الدينية واعتبار الصين دولة ملحدة ولحد اليوم وعلى حسب اقوال الرئيس
الصيني (سيجين بينغ) اي واحد بغا ينظم للحزب الشيوعي الصيني لي حاكم الصين حاليا
خاصو يكون ملحد..
الصين غتفكر انها تعوض الاله الحقيقي بإله رقمي كيراقب
المواطنين وكيعطي لكل واحد نقط علي حساب سلوكو وتصرفاتو وألفاظو، فمثلا لي كيشري
كتب مشي هو لي كيشري لعب من الانترنيت شكون لي كينعس فالوقت وشكون كيبقا ساهر
مكونيكطي واش كتخلص الضرائب فالوقت او كتعطل شنو الالفاظ والعبارات لي كتواصل بهم
مع اصدقائك فمواقع التواصل الاجتماعي... إلخ إلخ
الدولة عطات لنفسها الحق فمراقبة كل هد البيانات من
خلال شركات مختصة لهد المهمة لي غتجمعها وتعطيك تقييم او بالدارجة شحال جبتي ديال
النقط، وكما ان معدل الباك كيحكم عليك فاي نوع المدارس تدخل لها كذالك هد التنقيظ
لي حصل عليه المواطن الصيني هو لي من خلالو يقدر ياخد قرض من البنك او لا ، تقبل
له الڤيزا للسفر و لا، يتقبل فالوظيفة ولا لا وحتى من لوطيل الي كان تنقيطك طايح
ميقبلش بك تبات عندهم باعتبارك مواطن فاشل ومكتساهمش فنمو البلاد.. تقريبا غيولي
بحال رقم تابعك فينما مشيتي كيطلع وينزل علي حسب سلوك وتصرفاتك واي خدمة
احتاجيتيها من الدولة معدل التنقيط ديالك لي غيحكم علي واش تاخدها او لا، لدرجة ان
صاحب التنقيط الجيد غيكون عندو الويفي طيارة والعكس صحيح، تماما بحال شي اله كيفرق
الحسنات والسيئات غي هو بنظام رقمي الجنة ديالو خدمات جيدة من طرف الدولة واميازات
وتخفيضات فالاثمنة والنار ديالو عبارة عن اقصاء وتهميش...
من بين الشركات لي واقفة علي هد المشروع شركة wechat لي هي بمتابة وتساب فالصين لان وتساب وفيسبوك ممنوعين فالصين
وعندهم مواقع ديالهم ، فهد الشركة غتعطي جميع المحادثات دالمواطنين للدولة ،ومن
خلال كلامك تربح نقاط او العكس..
هد النظام بدا ف2013 وحاليا هو اختياري يعني لي بغا
يدخل يشارك فه وحسب احصائية قريتها سابقا حاليا كاين 300 مليون مشترك فهد البرنامج
وف2017 الصين منعات 6 مليون صيني من السفر بسبب ضعف التنقيط ومليون ونص ميركبوش
القطار..
الكحومة الصينية علنات انه ابتداءا من 2020 غيولي هد
النظام إلزامي على الجميع وكلشي مفروض عليه يدخل فه
وبالتالي غيولي هد الاله الرقمي عندو اتباع كيتقدرو
بمليار و400 مليون انسان قابلة للزيادة لان اكيد دول عديدة غتبغي تبنى نفس النظام...
المصادر:
ويكيبيديا
إرسال تعليق
0 تعليقات