الجزر المغربية المحتلة

من 1956 ل2019 دازت عقود على إستقلال المغرب، رغم أنه إستقلال شكلي حيث ورثات المملكة معاهدات و إتفاقيات إستنزافية من القوى الإمبريالية لكن كيفما كان الحال المملكة عندها سيادة و صوت فالمنتظم الدولي ، بغض النظر على الإتفاقيات المهينة ورتاث بلادنا عاهات مستديمة غتبقا تدير لينا لعصى فالرويضة وقتما نهزو صوتنا و نخرجو عينينا فأعداء الوطن ، من بين هاد العاهات مشكل الحدود الوهمية بينا و الجزائر و العلاقة المشحونة مع الجوار و التبعية الفرنسية و معضلة الصحراء و سبتة و مليلية لي مزال كنحلمو بتحريرهم، لكن كاينين شي حوايج محال واش المواطن العادي عارفهم ، اليوم جايين ندويو على الجزر المغربية المحتلة من طرف الإسبان الأوغاد.

كيضرني خاطري بزاف منين كنلقا شي وقفة سواءا فلافاك ولا فالشارع و الناس هازا شعارات كتندد بالإحتلال الإسرائيلي لفلسطين و كتغوت خيبر خيبر يا يهود جيش محمد سيعود و أنا كنشوف و كلي أمل فعودة المجد الموري الموعود باش يحرر أرضنا من الغزات لي محتلين 10 جزر مغربية فسواحل المتوسطي فأكثر مظاهر إنتهاك السيادة و الإحتلال التقليدي المباشر فالتاريخ المعاصر، فلسطين قضية ثانوية و مافيها باس نتعاطفو مع أهلها بصفتنا مضروبين بنفس المزود و حاسين بيه، لكن قضية الجزر المحتلة هي أولوية تاريخية خاص الشعب يتبناها كقضية وطنية .

الجزر الجعفرية أو إيشفارن بالأمازيغية و هي أرخبيل مكون من 3 جزر مجمل مساحتها 52 هكتار و بعيدة على الناظور فقط ب 3 كلم و محتلها إسبانيا من 1848 و معمر المغرب دكرها ولا هدر عليها ، جزر الحسيمة أو النكور بالأمازيغية و هي 3 جزر و مساحتهم الإجمالية 5 هكتارات و بعيدة على الحسيمة غير ب300 متر فقط!! و محتلهم إسبانيا من 1673 و فيهم الجيش تاعها حاليا، جزيرة غمارة أو قميرة أو جزيرة باديس بالأمازيغية و مساحتها هكتارين و بعيدة على ساحل الحسيمة غير ب 10 أمتار و حتى هي محتلها إسبانيا منذ 1564 ، جزر البرهان لي هما زوج جزر بعاد على مليلية ب 30 كلم و هما تحت السيادة الأسبانية من 1540 و تابعين إداريا لمالاقا ، جزيرة تورا و لي سماها الإعلام بالخطأ جزيرة ليلى حيث الإسبان كيقولو la isla يعني الجزيرة، و كتبعد ب 200 متر على ساحل طنجة تطوان و مساحتها 15 هكتار و المثير للشفقة هي إسبانيا مامحتلها لكن محرمة على المغرب يقربها بحيث ف2002 دخلو شي جنود مغاربة لتما و دارت إسبانيا إنزال عسكري بطائرات حربية و الكوموندو و طرادات و فرقاطة و غواصة و سفينة حربية و دخلو للجزيرة و إحتجزو 5 جنود مغاربة و غطاو ليهم ريوسهم بخناشي بيضين فواحد المشهد جد مهين بزاف.

10 جزر بالإضافة لسبتة و مليلية أي 12 منطقة مغربية محتلة يعني الوحدة الترابية مزال ماكتملات، صراع الصحراء الأزلي أجل المطالبة بهاد الجزر المغتصبة حيث إسبانيا عندها يد فقضية الصحراء كيف لا و هي من إحتلتها و حولات حلم وحدة المغرب الكبير كابوس للتفرقة بين الإخوة ، المغرب ميمكنش ليها تدخل فصراع متعدد الجبهات حيث إلى مشات حتى جابهات إسبانيا غدي تكون جبدات على راسها النحل و ضعفات موقفها فقضية الصحراء، إسبانيا ليست بالخصم الهين حيث موراها أهم تكتل إستراتيجي فالعالم لي هو الإتحاد الأوربي، يعني ضغوط لا حصر لها على المغرب و منساوش تواطئ الأمم المتحدة لي مامعتابراش الجزر المغتصبة أراض منتنازع عليها رغم أنها فالمياه الإقليمية المغربية و بقا ليها غير بضع أمتار و تلصق فسواحل الوطن.

لدلك خاص الدولة تلتزم بالجدية و تعاود تفتح الملف و باراكا علينا من هاد التخادل و التغاضي راه أرضنا هادي و حنا ماليها و لا يعقل دولة متأزمة بحال اسبانيا تجي و تفرض علينا رأيها و تحتقرنا و تتنمر علينا فعقر دارنا.

ذات صلة بالدارجة

الجزر المغربية المحتلة - بالدارجة -