أجي تعرف شنو هي الشيوعية - بالدارجة -

الشيوعية : مدينة كارل ماركس الفاضلة

كارل ماركس

فالقرن 17/18 تم اختراع الالة وكثر معاها الانتاج ، والعامل مبقاش عندو قيمة كالسابق لان الالة كتدير خدمة احسن واسرع منو وبتكلفة أقل..

الزيادة فالطلب على الالات غيأدي للثورة الصناعية لي بدورها غتأدي للرأسمالية...

على الورق النظام الرأسمالي دار قفزات خيالية، تكنولوجيا ونمو واختراعات لم يسبق لها مثيل، لكن على الضفة الاخرى أدى لتقسيم المجتمع لطبقتين، الفوق البورجوازية او الاغنياء لي هما صحاب المعامل ورؤوس الاموال وفالاسفل العمال الكادحين او البروليتاريين...

كارل ماركس وعشيرو فريديريك إنگلز غيحللو هد الظاهرة وخرجو بنتيجة ان الرأسمالية هي السبب ، وان سبب البؤس فأي مجتمع هي الطبقية، فقديما كان النبلاء والعامة، الاسياد والعبيد، الاقطاعيين والفلاحيين، ودبا البورجوازيين والبرولتاريين

ماركس معجبوش هد النظام الطبقي وكيشوف ان المستفيد الوحيد هم اصحاب رؤوس الاموال لي مكيديرو والو من غير انهم عندهم الفلوس ووسائل الانتاج بينما العامل لي كيتطحن ليل نهار وساعات طويلة من العمل مكيستفد والو...

فحطو تسائل ،.كفاش نقضيو على هد النظام الطبقي او بالأحرى كفاش نحررو الطبقة البروليتارية من ظلم البورجوازية

هنا قررو انهم يجيو بنظام جديد سماوه الشيوعية ولي كتعني إلغاء الطبقية وحق الملكية الفردية وگاع وسائل الانتاج من آلات ومصانع تحيد من ملكية البورجوازيين وتولي فملك العامة..

لكن واش البورجوازيين غيرضاو يتنازلو بسهولة على رزقهم ؟

هنا ماركس كيگول بطبيعة الحال لا والحل هو ان العمال او البروليتاريين غيقومو بثورة على البورجوازيين ويديو ليهم رزقهم بالقوة وگال ان هد المرحلة ضروري منها باش نوصلو للشيوعية العامة وبالتالي القضاء علي البؤس والفواوق الاجتماعية (الغاية تبرر الوسيلة)

وسما هد المرحلة بديكتاتورية البروليتاريين.

كلشي غيتحول لملك الدولة ويتم منع الملكية الفردية واي واحد دار فلوس كثيرة نزلو عليه بضرائب كبيرة ونرجعوها لخزينة العامة لان الدولة هي الوحيدة لي عندها الحق تملك وهي لي تكون صاحبة المصانع والشركات وهي البنك لي كيسلف الناس وهي لي تكلف بمجانية التعليم وگاع المواطنين يكونو سواسية تحت هد النظام، ونبقاو غاديين هكا بشوية بشوية حتى نوصلو للشيوعية المطلقة او مدينة ماركس الفاضلة لي ما فها بؤس ولا منافسة وكلشي كياخد بالتساوي لان الثروة حق للجميع...وهد المدينة معندهاش حدود لان الفكر الماركسي خاصو يتصدر لجميع بقاع العالم..

بقات الماركسية كتقلب على شي ارض خصبة تحتضنها وفنما كانت شي ثورة او انتفاضة كتلقا الحزب الشيوعي خاشي نيفو فها ، حاولو فألمانيا وفرنسا وإيطاليا والمجر ...فمجابش الله وأول ثورة شيوعية كانت فروسيا سنة 1917 بقيادة لينين وهي ما يعرف تاريخيا بثورة البلاشفة، ولي من خلالها الشيوعيين غيأسسو الاتحاد السوڤياتي لي كان كيظم روسيا واجزاء من اوربا ووسط آسيا وكلو تحت نظام الحزب الواحد الشيوعي

وكما توقع كارل ماركس تم تصدير الشيوعية لعدة دول فالعالم ومن بعد الاتحاد السوڤياتي غتحتاضنو دول بحال الصين وكوبا وكويا الشمالية وقدر يحكم نص الكوكب ففترة من الفترات ...

تقربلات ثورات وانقلابات وحرب باردة بين الشيوعيين بقيادة الاتحاد السوڤياتي والرأسماليين بقيادة الولايات المتحدة وكل طرف كيحاول يحط الاحزاب ديالو فالحكم

باش نكونو واقعيين الحلم ديال كارل ماركس بالمدينة الفاضلة بدون البؤس وكلشي فها سواسية مقدرش يخرج للواقع..

ديك المدينة الجميلة لي مفيهاش الطبقية ، خدام ولا مخدامش غتعيش مشافتش النور، وهذا بسبب الاحزاب الشيوعية لي وصلات للحكم ، وكمثال ناخدو الحزب الشيوعية فالاتحاد السوڤياتي لي كان كيتعتابر المثل الاعلى للشيوعية

البداية مع لينين وستالين لي خداو من الناس الاراضي بالقوة وفرضو عليهم يخدمو فها والمحصول كتاخدو الدولة وتصدرو وبفلوسو كتشري الالات والسلاح ..

النظام لي واعد الناس بالرفاهية عرف ففترة قصيرة عدة مجاعات مشا ضحيتها كثر من 20 مليون انسان زيادة على الاعدامات والقتل خصوصا ففترة حكم السفاح ستالين لي عدم كثر من 30 مليون واحد بمجرد الاحتجاج او مخالفة الحزب الحاكم فطريقة تفكيرو ، وبعد تعاقب عدة رؤساء جات فترة حكم گورباتشوف لي فكر انه يدخل الرأسمالية مع الشيوعية وسمح بالتعددية الحزبية وبعض الحريات وانشاء شركات خاصة فنقلبو عليه وانهار معاه الاتحاد السوڤياتي سنة 1991 ولحد الان باقي بعض الدول كتبنى الشيوعية بحال كوريا الشمالية، لكن داك الشيوعية لي حلم بها كارل ماركس مزال مكتابش تخرج للوجود.

نتمنى نكون قدرت نحطكم فالصورة

ذات صلة بالدارجة

• المسيحية النشأة الزمان والمكان - بالدارجة -
• الاله الرقمي يراقبك - بالدارجة -
• غسيل الاموال - بالدارجة -
• شكون قتل كينيدي ؟ - بالدارجة -